டிஜிட்டல் பரிவர்த்தனையை பயன்படுத்தும் 45.6% குடும்பத்தினர்: SBI study

இந்தியாவில் உள்ள குடும்பங்களில் சுமார் 45.6 சதவீதத்தினர் தங்களின் அன்றாட நுகர்வுத் தேவைகளில் ஏதேனும் ஒரு பொருளை வாங்குவதற்கு ஆன்லைன் ஷாப்பிங் மற்றும் டிஜிட்டல் பணப்பரிவர்த்தனை வழிமுறைகளைப் பயன்படுத்துகின்றனர். எனினும், நாட்டின் பெரும்பான்மையான குடும்பங்கள், அதாவது 54.4 சதவீதத்தினர், இன்னும் தங்களின் வாங்குதல்களுக்குப் பாரம்பரிய ரொக்கப் பண முறைகளையே நம்பியுள்ளனர் என்று பாரத ஸ்டேட் வங்கி (எஸ்பிஐ) வெளியிட்டுள்ள புதிய ஆய்வறிக்கை தெரிவிக்கிறது.

டிஜிட்டல் கட்டண முறைகளைப் பயன்படுத்தும் குடும்பங்களின் சராசரி மாதாந்திர தனிநபர் நுகர்வுச் செலவு (MPCE), வழக்கமான ரொக்கப் பரிவர்த்தனை செய்யும் குடும்பங்களை விட 7.5 சதவீதம் அதிகமாக உள்ளது என்று இந்த ஆய்வு சுட்டிக்காட்டுகிறது. 

இருப்பினும், டிஜிட்டல் பயன்பாட்டில் வருமான அடிப்படையிலான பெரிய இடைவெளி நீடிக்கிறது. நாட்டின் மிகக் குறைந்த வருவாய் கொண்ட கீழ்நிலை 20% குடும்பங்களில் டிஜிட்டல் பயன்பாடு 25.3 சதவீதமாக மட்டுமே உள்ள நிலையில், அதிக வருவாய் கொண்ட மேல்நிலை 20% குடும்பங்களில் இது 69.5 சதவீதமாக உயர்ந்துள்ளது.

துறை ரீதியான நுகர்வு நிலவரம்

குடும்பச் செலவினங்களின் வெவ்வேறு பிரிவுகளில் டிஜிட்டல் பயன்பாடு பெருமளவில் மாறுபடுகிறது. ஆன்லைன் கொள்முதல்களில் நுகர்பொருட்கள் மற்றும் சேவைகள் பிரிவு 39.68 சதவீதத்துடன் முதலிடத்திலும், நீடித்து உழைக்கும் நுகர்பொருட்கள் பிரிவு 23.3 சதவீத பங்கையும் கொண்டுள்ளன. நீடித்த நுகர்பொருட்களில் ஆடைகள் வாங்குவது 19.97 சதவீதமாகவும், காலணிகள் வாங்குவது 12.05 சதவீதமாகவும் உள்ளது. 

அதே நேரத்தில், மரச்சாமான்கள் (0.18%), மருத்துவ உபகரணங்கள் (0.32%) போன்ற அதிக மதிப்புள்ள பொருட்களின் டிஜிட்டல் கொள்முதல் மிகவும் குறைவாகவே உள்ளது.

இந்தியக் குடும்பங்களின் மொத்தச் செலவினத்தில் 32.82 சதவீதப் பங்கைக் கொண்டுள்ள உணவுப் பிரிவில், டிஜிட்டல் பயன்பாடு வெறும் 7.10 சதவீதமாக மட்டுமே உள்ளது. இதில் வழக்கமான மளிகைப் பொருட்கள் வாங்குவதில் 4.29 சதவீதமும், சமைக்கப்பட்ட உணவுகளுக்கு 2.6 சதவீதமும், பாக்கெட் செய்யப்பட்ட உணவுகளுக்கு 1.65 சதவீதமும் டிஜிட்டல் முறைகள் பயன்படுத்தப்படுகின்றன. 

விரைவில் கெட்டுப்போகும் உணவுப் பொருட்களான காய்கறிகளுக்கு 1.32 சதவீதமும், புதிய பழங்களுக்கு 1 சதவீதமும், முட்டை, மீன் மற்றும் இறைச்சிக்கு வெறும் 0.59 சதவீதமும் மட்டுமே டிஜிட்டல் பரிவர்த்தனைகள் மேற்கொள்ளப்படுகின்றன.

மாநிலங்களின் பங்களிப்பு

டிஜிட்டல் பயன்பாடு மற்றும் சராசரி மாதாந்திர நுகர்வுச் செலவினங்களின் அடிப்படையில் மாநில அளவில் ஹரியானா முதலிடம் வகிக்கிறது. இதனைத் தொடர்ந்து கோவா, நாகாலாந்து மற்றும் கேரளா ஆகிய மாநிலங்களும் முக்கிய நுகர்வுப் பிரிவுகளில் முன்னணி வகிக்கின்றன.